14.05.2021 |
Viure als Pirineus

PROJÈCTE TRANSFRONTERÈR

Era sindica d’Aran presidís eth Comitat de Pilotage deth projècte TransGarona

Eth projècte Transgarona ei un projècte transfronterèr que traçarà un camin ciclable que  connectarà era Val d’Aran damb eth centre-sud de França.
TransGarona 1
Amassada deth Comitat de Pilotage deth projècte europèu “TransGarona” /CGA
Era sindica d’Aran presidís eth Comitat de Pilotage deth projècte TransGarona

Aguest divendres a auut lòc, en format semipresenciau, era amassada deth Comitat de Pilotage deth projècte europèu “TransGarona”, qu’a estat presidida pera sindica d’Aran, Maria Vergés, e es vicepresidents/es deth Conseil Départemental de la Haute-Garonne, Maryse Vezat-Baronia, Marie-Claude Leclerc e Jean-Michel Fabre.

En aguesta amassada, ena qu’an estat presents tanben eth conselhèr de Governacion, Amador Marqués, eth president deth Comitat Departamentau de Torisme dera Haute-Garonne, Didier Cujives, e es servicis tecnics d’andues institucions, s’an tractat er estat actuau deth projècte e es actuacions a nivèu toristic e de promocion a desvolopar.

Eth projècte Transgarona, impulsat peth Conselh Generau d’Aran e eth Conseil Départemental de la Haute-Garonne a trauès d’un programa Interreg POCTEFA, ei un projècte transfronterèr que traçarà un camin ciclable que  connectarà era Val d’Aran damb eth centre-sud de França.

TransGarona 2

Ei previst qu’es trabalhs ena part francesa d’aguest camin ciclable siguen finalizadi entà junh d’aguest madeish an. En çò que tanh ara part aranesa, dejà se finalize era licitacion dera prumèra fasa deth traçat, que va dera termièra enquia Pònt de Rei, e s’a demanat ua prorròga enquia abriu de 2022 entara dusau fasa, que va de Pònt de Rei ara Lana de Les.

Era sindica d’Aran a volut destacar “era grana importància qu’a eth camin ciclable TransGarona en çò que hè ara relacion interterritoriau dera Val d‘Aran damb era Haute-Garonne, atau coma a nivèu esportiu e toristic” e higie que “eth projècte Transgarona contribuirà a facilitar ues politiques territoriaus de mobilitat sostenibla, espòrt e salut e activacion territoriau per miei dera valorizacion deth pròpri territòri”.

Era inversion en aguest projècte per part deth Conselh Generau d’Aran ei de 1,25 milions d’euròs, e eth Conseil Départemental de la Haute-Garonne invertirà 2,43 milions. Aguesta inversion vierà finançada ath 65% per part d’un hons FEDER.

Era sindica d’Aran presidís eth Comitat de Pilotage deth projècte TransGarona
Comentarios