17.09.2021 |
Viure als Pirineus

INSTITUCIONS

Era sindica d’Aran demane ath ministre Iceta eth reconeishement dera Val d’Aran ena legislacion estatau

Era sindica d’Aran s’amasse damb eth ministre de Politica Territoriau e Foncion Publica
Maria Vergés Miquel Iceta
Era sindica d’Aran, Maria Vergés, s’amassèc damb eth ministre, Miquel Iceta /CGA
Era sindica d’Aran demane ath ministre Iceta eth reconeishement dera Val d’Aran ena legislacion estatau

Era sindica d’Aran, Maria Vergés, s’amassèc ager en Madrid damb eth ministre de Politica Territoriau e Foncion Publica, Miquel Iceta. En aguesta trobada, ena que tanben i participèc eth secretari d’estat, Víctor Francos, se tractèren diuèrsi ahèrs d’interès entara Val d’Aran coma eth reconeishement dera especificitat d’Aran ena legislacion estatau, es ajudes ath sector dera nhèu, es rèptes qu’encaren es zònes de montanha coma Aran e era situacion der aranés entre d’auti.

Per çò que hè ara singularitat d’Aran, eth Conselh Generau a estat trabalhant es darrèri mesi en ua prepausa jurídica que permete eth reconeishement dera especificitat dera Val d’Aran ena legislacion estatau, e qu’era sindica d’Aran presentèc ager ath ministre Miquel Iceta.

“Aguest reconeishement permeterie ara Val d’Aran, e ath Conselh Generau d’Aran coma maxima institucion deth territòri, ampliar eth sòn marc juridic e administratiu e reafirmar eth nòste autogovèrn” manifestaue era sindica Maria Vergés e higie que “dempús d’auer artenhut eth reconeishement politic e normatiu per part dera Generalitat de Catalunya, deth govèrn d’Aran estant pensam qu’ei eth moment d’arténher tanben eth reconeishement normatiu der Estat, qu’enquiath moment a reconeishut politicament eth nòste territòri, damb era mocion deth Senat de mai de 2013, aprobada damb motiu deth VII Centenari der autrejament dera Querimònia”.

Atau madeish, pendent era amassada, era sindica d’Aran tanben expausèc ath ministre “eth besonh de plantejar de quina manèra podem reactivar es activitats economiques des pòbles de montanha” e li  expliquèc es diferents accions que comencen a amiar-se a tèrme en Aran en matèria d’innovacion, torisme sostenible, eliminacion dera peada de carbòni e profitament dera biomassa, entre d’autes.

Era sindica d’Aran profitèc tanben entà interessar-se pes ajudes que poderie recéber eth sector dera nhèu “qu’ena Val d’Aran, pr’amor des restriccions de mobilitat adaptades pera sitacion sanitària, s’a vist fòrça afectat e a viscut ua sason d’iuèrn atipica e qu’a afectat tanben as sectors d’ostalaria, restauracion e comèrç deth territòri”. Atau madeish, trasladèc tanben quina ei era realitat d’Aran e deth sòn autogovèrn atau coma era situacion qu’atrauèsse era nòsta lengua pròpria, er aranés, e li plantegèc era possibilitat de qu’eth Ministèri de Politica Territoriau e Foncion Publica balhe supòrt ath nòste territòri.

Era sindica d’Aran demane ath ministre Iceta eth reconeishement dera Val d’Aran ena legislacion estatau
Comentarios