Era senadora Anna Azamar reclame ara comission de cultura mès emparament entara lengua aranesa

Era senadora pirenenca, Anna Azamar, a presentat aguesta setmana ara Comission de Cultura e Espòrts deth Senat ua mocion en defensa dera lengua aranesa. Azamar a reclamat, encara un còp, qu’er Estat realize mecanismes d'emparament d’aguesta lengua, que comprenen eth 90% dera poblacion aranesa, ei liejuda peth 60%, mès parlada sonque, de forma abituau, per 2500 persones.

Anna Azamar
photo_camera La senadora Azamar ha reclamat la protecció de la llengua aranesa.

Tanta ei era deishadesa deth govèrn der Estat envèrs ara lengua aranesa, qu'aguest passat 2018, en tot presentar eth govèrn eth cincau informe de compliment dera carta de lengües, es justificacions d’accions en favor der aranés, auien estat totes realizades exclusivament pera Generalitat de Catalonha o peth Conselh Generau d’Aran.

Azamar a profitat entà arrebrembar qu’er Institut d’Estudis Aranesi, a presentat, per aguesta arrason, ua queisha en Parlament Europèu qu'a estat admetuda.

Era mocion siguec refusada damb es vòts eth contra de PP e grop mixte, era abstencion deth PSOE, e es vòts a favor de PNV e Podemos.

Aguesta madeisha setmana, Azamar, intervenguec ena madeisha comission en tot arrespóner ara senadora de Foro Asturias, Rosa Domínguez de Posadas, qu’instaue ath govèrn espanhòu a amparar e preservar era integritat der Archiu dera Guèrra Civiu Espanhòla de Salamanca damb ua contondenta replica: “Era Espanha der an 2019 se semble de mès en mès ara de 1939”.