17.04.2021 |
Viure als Pirineus

EQUIPAMENTS

Barre temporaument eth Palai de Gèu de Vielha per grèus damnatges ena sua estructura

Un informe encargat per Ajuntament de Vielha e Mijaran a determinat eth mau estat en diuèrsi punts dera estructura damb un risc imminent de seguretat tàs usatgèrs
Palai de Gèu de Vielha
Palai de Gèu de Vielha /FS
Barre temporaument eth Palai de Gèu de Vielha per grèus damnatges ena sua estructura

A compdar d’aguest diuendres, eth Palai de Gèu de Vielha barre es sues pòrtes temporaument pr’amor des grèus damnatges que patís ena sua estructura.

Er Ajuntament de Vielha e Mijaran encarguèc un informe a ua empresa especializada entà saber en quin estat se trape era installacion, damb er objectiu de poder precisar es inversions e melhores qu’er Ajuntament a previstes entà enguan.

Er equip de govèrn a prenut era decision abantes de disposar d’aguest informe finau, dempús de qu’era pròpria empresa comuniquèsse telefonicament qu’er estat dera estructura en diuèrsi punts ei fòrça maumerenc, e deuant deth naut perilh que i a respècte ara seguretat des usatgèrs enes activitats esportives que se realizen abituaument en Palai de Gèu, atau coma dera rèsta d’entitats qu’an preséncia ena planta baisha dera bastissa.

Per tant, er equipament municipau demorarà barrat enquia nau avís, e ja se trabalhe entà cercar solucions que poguen garantir era estabilitat dera estructura, sense méter en perilh as usatgèrs e trabalhadors, e poder tornar a daurir çò de mès lèu possible.

Un viatge coneishuda era gravetat dera situacion, er equip de govèrn s’a metut en contacte damb es pòrtavotz dera oposicion en consistòri e damb totes es entitats que realizen activitats ena sedença deth Palai de Gèu, entà transméter era decision deth sòn barrament.

“Aguest madeish diuendres era empresa encargada de hèr er estudi sus era estructura deth Palai de Gèu, dempús de realizar es trebalhs, mos an informat immediatament dera gravetat dera situacion que presente. Auem actuat en tot priorizar era seguretat des usatgèrs e trabalhadors dera installacion e dera rèsta d’entitats dera bastissa”, comente eth baile de Vielha e Mijaran, Juan Antonio Serrano. E ahig que “ja auem començat a trabalhar ena cerca de possibles solucions que garantise era estabilitat der equipament e mos permete procedir ara sua redubertura çò de mès lèu possible”.

Barre temporaument eth Palai de Gèu de Vielha per grèus damnatges ena sua estructura
Comentarios