00:36h. Diumenge, 25 Juny de 2017

Musèus dera Val d’Aran presente ua programacion especiau tath Dia Internacionau des Musèus

Se tracte d’un eveniment assolidat d’abast mondiau, que se celèbre eth dia 18 de mai

Pont de Rei.
Pont de Rei.

Un an mès, eth Musèu dera Val d’Aran se some ara celebracion deth Dia Internacionau des Musèus. Se tracte d’un eveniment assolidat d’abast mondiau, que se celèbre eth dia 18 de mai e qu’enguan prepause coma tèma comun: Musèus e istòries controvertides. Díder aquerò que non se pòt díder enes musèus. Restacant-se damb aguesta tematica, en Musèu dera Val d’Aran aurà lòc era serada “Huec en temps de guèrra”, a on s’amiaràn a tèrme accions que cerquen apregondir enes conflictes deth nòste territòri.

Ena serada se presentaràn es pèces convidades. Se tracte de quauques bales e rèstes de bombes de fragmentacion que serviren ena des·hèta de Castèth Leon en 1719 e, donc, testimònis dera pèrta dera fortificacion mès importanta dera Val. Aguestes òbres, damb un naut contengut simbolic, non an estat jamès exposades en musèu.

Era serada deth 18 de mai culminarà damb era conferéncia de Josep Calvet, “Hugent des nazis. Era Val d’Aran e es refugiats dera Dusau Guèrra Mondiau”. Damb aguesta conferéncia se preten dar a conéisher eth papèr destacat que joguèc era Val d’Aran en aguest episòdi istoric, enquia ara practicaments desconeishut, coma pas de termièra e coma tèrra d’acuelhuda. Ua tematica que permet establir punts de contacte damb un fenomèn actuau: es migracions, exòdes e es desplaçaments forçadi dera populacion.

A mès d’aguesta serada, damb motiu deth Dia Internacionau des Musèus se poderà gaudir d’entrada gratuïta deth 18 enquiath 21 de mai en Musèu dera Val d’Aran e er Ecomusèu Çò de Joanchiquet.