01:23h. Dijous, 24 d'Agost de 2017

Jornada "Mieis de comunicacion en aranés" organizada per IEA

Era presentacion dera jornada correrà a cargue deth vicesindic d’Aran, Luís Carlos Medina e deth president dera Academia, Jusèp Loís Sans.

Cartelh mieis de comunicacion en aranés.
Cartelh mieis de comunicacion en aranés.

Er IEA-Academia aranesa dera lengua occitana, prepause ua jornada de debat e reflexion sus eth papèr des mieis de comunicacion ena preservacion e era promocion dera lengua aranesa, e deth sòn emplec sociau, atau coma tanben des rèptes de futur des mieis de comunicacion en Aran e deth papèr qu'aguesti an de jogar en aguest sens.

Era jornada se celebrarà ena sedença der IEA-Academia aranesa dera lengua occitana eth pròplèu diuendres 7 de juriòl entà 18 ores e ei dubèrta a tot eth qu’i volgue participar.

Des der an 1994 a artenhut detier era regression der emplec sociau dera lengua que de manèra permanenta se produsie, e que comportèc era pèrta de 30% de parlants.

Actuaument, encara qu'aumente eth nombre de gent que lieg e escriu en aranés, eth sòn emplec sociau seguís baish en favor deth castelhan. Un estudi presentat est an passat, en basa a donades deth 2013, constate que 55,1% d'aranesi parlen abituauments en castelhan, e sonque 17,6% ac hèn en aranés, ath temps que 16,4% utilizen eth catalan e 10,6% d'autes lengües, que facilament pòden acabar incorporant-se ath grop majoritari deth castelhan.

Deuant d'aguesta situacion: Quin papèr an de jogar e com pòden influïr es mieis de comunicacion, publics e privadi, presents ena Val d’Aran e es professionaus qu'intervien, en relacion ara lengua, ara sua coneishença e ath sòn emplec? Era Val d'Aran a compdat damb mieis de comunicacion tant publics coma privadi, en premsa escrita (Avui e Aué), revistes (publicades en part en aranés; Aran Nau, TOT Aran, Era Borrufa), ràdio (Catunya Ràdio e Catalunya Informació) e TV (Tv3-Meddia Aranés, 3/24, BTV, Aran TV). enes darrèri tempsi Aran, coma per tot, tanben a viscut era aparicion de mieis de comunicacion en contorn digitau (Aran Nau Digitau e Aué TV).

En aguest sens, era Corporacion Catalana de Mieis Audiovisuaus produsís en aranés programes de television e ràdio. Des der an 1988 eth grop d'emissores de Catalunya Ràdio emet programes de desconnexion en aranés e des deth mes d'octobre de 2009 aufrís, a trauès deth 3/24, un espaci informatiu diari de television en aranés entà tot Catalonha, e un espaci dedicat ena Val d’Aran en portau d'internet TV3.cat, damb informacions sus espacis produsidi e dobladi en aranés.

Ena Taula Redona sus mieis de comunicacion e lengua intervieràn:

Ferriol Macip. Jornalista, arrevirador, glosador, musician, occitanista e esperantista catalan.
Coma jornalista, ei redactor, editor e presentador dera edicion aranesa der informatiu en occitan #aranésòc, coprodusít per Barcelona TV e era Associacion entara Difusion d'Occitània en Catalonha (ADOC). Des deth 2012 dirigís eth diari digitau en occitan Jornalet.

Manel Zabala. Jornalista e escrivan catalan. Collaborador des suplements culturaus des periodics Avui e La Vanguardia, tanben ei productor, redactor e presentador de Infòc, informatiu culturau en lengua occitana que s'emet semanalament en Barcelona Television. Autor des libres de relats Ieu sabi un conte... (2001, Prèmi dera Critica Serra d'Or) e Massa cafè (2003, Nau Talent FNAC), atau coma deth roman infantil El camaleó, el gripau i la vella Serengueti  (1997). A editat era antologia Condes d'Occitània (2004) e es sòns relats an estat publicadi, en version castelhana, en Espanha e Mexic.

Manuel Moga. Jornalista. Licenciat en Periodisme ena UAB - Universitat Autonòma de Barcelona. Licenciat en Sciéncies Politiques e Administracion Publica ena UAB - Universitat Autonòma de Barcelona. Presentador der informatiu diari en aranés Aran TV. Redactor der Aué e dera emission der Aué TV, un espaci en aranés que presenten jornalièraments Manu Moga e Clara Villar.

Josep Casasayas. Licenciat en Direccion de RRPP e Marqueting pera Universitat de Wales - Barcelona. Postgrau de Marqueting digitau e Social Media ena Universitat Ramon Llull, LaSalle - Barcelona. A trabalhat en diuèrses agéncies de comunicacion e marqueting coma son: Tinkle Agéncia de comunicacion, FHIOS-Agéncia marqueting digital. A trabalhat en Conselh Generau d’Aran, coma assistent deth Departament de Premsa e Comunicacion. Des der an 2015, CEO en Arthénher era prumèra agéncia de comunicacion e marqueting online dera Val d'Aran.

Silvia Puértolas. Jornalista. A estat religada damb Television de Catalonha des der an 1992. Hec es sues practiques formatives de Sciéncies dera Informacion en Departament d'Espòrts, a collaborat damb era delegacion de Tv3 ena Val d’Aran, e en LaMalla.cat, Damb era prumèra difusion en aranés per internet d'informacion locau. Realizèc en Tv3 era narracion dera finau dera Copa deth Rei en lengua aranesa entara Val d’Aran. Actuauments collabòre en Pirenèus Ràdio.

Iñaki Delaurens. Licenciat en Periodisme pera Universitat Rovira i Virgili. Mastèr de Periodisme especializat en Cultura IDEC-Universitat Pompeu Fabra. Diplomatura de Torisme Universitat Rovira i Virgili. Siguec encargat de comunicacion deth projècte europèu SUD'EAU 2 en ajuntament de Vielha e Mijaran. A trabalhat en diuèrsi mieis coma eth Suplement Cultures de "La Vanguardia", Revista "Viatges e Istòria" de National Geographic. Collaborador deth diari digitau en occitan Jornalet, gaceta occitana d'informacions. A estat locutor e scenarista en Ràdio Sant Pere i Sant Pau, e productor, redactor e locutor en Ràdio Val Pirenèus. Actuauments des der an 2012 ei redactor d'espòrts e suplements deth Diari de Tarragona.

Iñaki Delaurens serà ath delà er encargat de moderar era taula redona.

 

* Inscriu-te al nostre canal de notícies de Telegram per assabentar-te de tot el que passa al Pirineu.