11:14h. Divendres, 23 Juny de 2017

Jornada de debat en Conselh Generau d’Aran sus er urbanisme ena Val d’Aran


Ena jornada convocada peth sindic d’Aran, Carlos Barrera, an participat es bailes dera Val d’Aran atau coma personau des servicis tecnics e juridics deth Conselh Generau d’Aran.

Una fòto dera jornada.
Una fòto dera jornada.

Ièr diuendres a agut lòc en Conselh Generau d’Aran, ua jornada de debat sus er urbanisme ena Val d’Aran e es importants cambis que s'an produsit enes darrèri ans en marc legislatiu e normatiu en matèria d'organizacion deth territòri e urbanisme dera Val d'Aran.

Ena jornada convocada peth sindic d’Aran, Carlos Barrera, an participat es bailes dera Val d’Aran atau coma personau des servicis tecnics e juridics deth Conselh Generau d’Aran.

Era Lei de regim especiau d’Aran establís es competéncies deth Conselh Generau d’Aran, encara qu'eth sòn exercici efectiu se ve condicionat ath prealable desvolopament normatiu. Aguesta circonstància s'aplique, per exemple, en ahèrs tan fonamentaus coma eth reglament dera Comission d'Urbanisme dera Val d’Aran e era possibilitat de priorizar eth pes deth Conselh Generau en aguest organ, atau coma preveir era intervencion des ajuntaments.


Un des aspèctes tractadi pendent era jornada de debat, en çò que tanh ath Plan Director Urbanistic dera Val d'Aran, a estat que cau auer en compde qu'entà eth desvolopament des sues determinacions e potencialitats, se hè de besonh adoptar diuèrses mesures coma:

Era adaptacion des Nòrmes Subsidiàries as determinacions deth Plan Director Urbanistic dera Val d’Aran (PDUVA) e ena legislacion urbanistica; era redaccion deth Plan Especiau Urbanistic (PIE) deth Garona; o era resolucion des incoacions des nuclèus urbans coma BCIN, donques qu'aguest conjunt d'estruments permeterie méter ath dia aspèctes tan importants coma era regulacion des edificacions e es emplecs, era incorporacion de critèris e paramètres d’inundabilitat, accessibilitat, intervencion de Pompièrs e Proteccion Civiu, sostenibilitat e entorns de proteccion patrimoniau.

Cau arrebrembar qu'enguan se complís eth 35au aniversari dera aprobacion des Nòrmes Subsidiàries e Complementàries de Planejament dera Val d'Aran, figura principau ena preservacion e eth desvolopament deth conjunt deth territòri aranés. Un des objectius dera jornada de debat, ei justaments profitar entà aprigondir ena possibilitat d'analisi e era sua adaptacion ath marc normatiu en vigor.

Actuauments se tròben en procès de desvolopament era Modificacion des Nòrmes Subsidiàries relatives as bòrdes e cabanes, ua prepausa formulada coordinadament peth Conselh Generau d’Aran damb eth conjunt d'Ajuntaments dera Val d’Aran, e eth Plan Especiau Urbanistic deth Garona, en periòde de redaccion.