Eth sindic d’Aran presente er estudi de melhores urgentes dera N-230

Eth pressupòst d'aguestes accions segontes aguest estudi ei de 90 milions d'èuros

val d'aran
photo_camera Eth sindic d’Aran presente er estudi de melhores dera N-230

Eth sindic d’Aran, Carlos Barrera, a presentat as bailes dera Val d’Aran e dera Nauta Ribagòrça er estudi encargat peth Conselh Generau d’Aran de melhores urgentes a realizar ena carretèra N-230 entà melhorar era seguretat vial en tram que va des deth Pas d’Aran enquiara Boca Sud deth Tunèl de Vielha.

Ara reünion convocada peth sindic d’Aran, a assistit eth president deth Conselh Comarcau dera Nauta Ribagòrça, Josep Lluís Farrero, amassa damb era bailessa de Vilaller María José Erta e d'auti representants de municipis dera comarca, e es bailes de Vielha, Juan Antonio Serrano, de Bossòst, Amador Marqués, de Les, Emilio Medan e d'Es Bòrdes, Francesc Medan.

Eth sindic d’Aran, Carlos Barrera, expliquèc qu'er estudi s'a encargat fonamentauments entà melhorar era seguretat vial e entà tractar de redusir eth nombre d'accidents. Entà potenciar es punts de tresau carril entà auançaments que pòden èster reversibles, entà facilitar era circulacion tant d'entrada coma de gessuda ena Val d’Aran, sustot enes dimenjades e en sason d'iuèrn. Barrera ahigec qu'er estudi, damb un pressupòst de 90 milions d'èuros, projècte eth bastiment, ath delà, de dus viaductes en tram d’Escales, era melhora des ràdis des corbes mès perilhoses entà evitar era sinistralitat sustot deth transpòrt pesat e melhorar era seguretat des torismes.

En aguest estudi s'a realizat ua analisi der estat actuau d'aguesta carretèra e dera sinistralitat dera madeisha, en tot utilizar es paramètres emplegadi peth Ministèri de Foment, en çò que tanh a amples, vòres e ràdis de corbes e en tot priorizar sustot eth hèt d'èster fòrça suenhadi damb er impacte ambientau e païsatgistic. Totes es prepauses de melhora deth traçat dera N-230 se hèn en tot optimizar es trams de carretèra d'orografia mès plana, entà que aguestes accions agen un còst assumible e en tot auer en compde era IMD (intensitat mieja jornalièra de trafic) tant de veïculs de transpòrt pesat coma de torismes.

Eth projècte s'a elaborat ath delà en tot hèr era analisi des punts neres a on i a mès frequéncia d'accidents e en tot hèr ua estimacion deth creishement exponenciau deth transpòrt de merces pera N-230 enes pròplèus 10 ans, entà assegurar qu'aguest increment non represente en principi un aument desmesurat dera perilhositat. Era prepausa contemple eth bastiment de 13 km de tresau carril d'auançament que poderie èster reversibla, unicaments entà torismes, enes zònes d'orografia mès favorabla, entà dotar de major seguretat es auançaments, en tot auer en compde qu'es trams d'auançament actuau son absoludaments insufisenti en relacion ath transpòrt pesat que absorbís jornalièraments era N-230.

Tanben se prepause melhorar quauqu'un des trams mès perilhosi de corbes, ena zòna d’Escales, concrètaments en antic pòble d’Aulet e tanben melhorar eth ràdi des corbes mès perilhoses. Eth projècte tanben incorpòre eth bastiment de rotondes enes crotzes mès perilhosi, era de connexion dera N-230 damb era N-260, e eth horcadís dera carretèra dera Val de Boí. Eth pressupòst d'aguestes accions segontes aguest estudi ei de 90 milions d'èuros.

Es bailes dera Val d’Aran e dera Nauta Ribagòrça an avalorat fòrça favorablaments aguest estudi, pr’amor qu'an dit, se tracte d'un projècte avient as besonhs deth territòri. Eth sindic d’Aran, Carlos Barrera, expliquèc fin finau qu'eth següent pas serà demanar era convocatòria d'ua naua reünion damb es presidents des Deputacions de Lhèida e Òsca e de toti es bailes des poblacions que crotze era N-230, entà dar traslat der estudi ath Ministèri de Foment. Barrera, a ahijut qu'er estudi deth Conselh Generau d’Aran ei totauments compatibla e complementari damb eth projècte qu'actuauments ei redactant eth pròpri Ministèri.