Constitucion dera associacion “Es Paums” en Vilamòs

Era sua finalitat constitutiua qu’ei de promòir era musica, era lengua, era cultura e quinsevolh activitat qu’age a veir tamb era identitat aranesa e vò amassar a toti es que i siguen interessadi

Vilamos sedença dera Associacion
photo_camera Vilamos sedença dera Associacion

Eth passat diuendres dia 6 d’octobre en programa de Lleida TV sus Vilamòs, s’anoncièc era constitucion dera associacion sense ànim de lucre “ES PAUMS, Associacion tà promòir era musica, era lengua e era cultura aranesa”.

Era anóncia la heren es representants dera Associacion pendent era emission  deth programa Cafeina qu’eth dia 6 installèc eth sòn platò en Vilamòs tà eméter un especiau sus eth pòble tamb motiu d’auer artenhut eth Prèmi de Vilamòs coma Pòble mès polit de Lleida, segontes es lectors deth Diari Segre, que en ues votacions tamb mès de 200 pòbles candidats an autrejat a Vilamòs eth 52% des vòts. Era Associacion ES PAUMS a era sua sedença en Vilamòs (Val d’Aran) mès eth sòn àmbit d’actuacion ei era Val d’Aran e tota Occitània. Era sua finalitat constitutiua qu’ei de promòir era musica, era lengua, era cultura e quinsevolh activitat qu’age a veir tamb era identitat aranesa e vò amassar a toti es que i siguen interessadi. Entre es sòns projèctes mès immediats qu’i a compausar, editar e interpretar musica en aranés, méter musica as tèxtes de poètes aranesi e  difóner es atractius  culturaus e toristics de Vilamòs e dera Val d’Aran.

Enquiara sua constitucion era Associacion ES PAUMS (abans Grop de Musica) ja a portat a tèrme projèctes restacats tamb es sons fins fundacionaus: edicion deth videoclip en aranés Net de Huec, edicion deth CD de musica aranesa ERA SOCA DE NADAU basat en tèxtes deth poèta Jèp de Montoya tamb era collaboracion deth Conselh Generau d’Aran e er Institut d’Estudis Ilerdencs, campanha tà arténher eth Prèmi de Vilamòs coma eth Pòble mès Polit de Lhèida, edicion des Gòis a Sant Ròc de Vilamòs tamb era collaboracion deth Conselh Generau d’Aran, aumenatge e edicion deth huelheton biografic deth filològ Joan Coromines tamb era collaboracion der Institut d’Estudis Aranesi, Acadèmia Aranesa dera lengua occitana, organizacion deth Torneg Popular de Tènnis de Taula de Vilamòs tamb era collaboracion der Ajuntament de Vilamòs, gestion deth Grop de Convèrsa aranés/occitan tamb era collaboracion der Institut de Llengues dera Universitat de Lhèida,  concèrts de musica aranesa, concèrt e missa cantada en aranés de Es Paoesses, campanha tara creacion deth logotipe “Vilamòs, tiò cultura e natura”, e era collaboracion tamb era plataforma d’aprentissatge aranés on line Club Aranés.

Des de era Associacion ES PAUMS animen a toti, siguen o non dera Val d’Aran a  junher-se ath projècte. Mès informacion en: [email protected] o en Facebook: https://www.facebook.com/AssociacionEsPaums/