El Conselh Generau d’Aran presente entà Sant Jordi era colleccion de condes “Petit País”

Ua iniciatiua dera comunitat educatiua des escòles dera Val d’Aran e deth Departament de Cultura e Politica Lingüistica deth Conselh Generau d’Aran

petit
photo_camera Luís Carlos Medina presente era colleccion de condes Petit País

Damb motiu dera celebracion dera jornada de Sant Jordi, eth vicesindic d’Aran, Luís Carlos Medina, a presentat era colleccion de condes Petit País ena sedença deth Conselh Generau d’Aran.

Era colleccion de condes “Petit País” ei ua naua colleccion de condes en aranés que nèish entà dar responsa a un besonh manifestat pes membres dera comunitat educatiua des escòles dera Val d’Aran, amassa damb eth Centre de Recorsi Pedagogics e eth servici de Cultura e Politica Lingüistica deth Conselh Generau d’Aran, entà crear, elaborar e adaptar materiau didactic e produccions literàries en aranés entà mainatges e mainades d’ensenhament preelementari e de cicle iniciau e facilitar ua bona abitud de lectura ena escòla, aprigondir ena estructura deth lenguatge orau, dera memòria visuau e auditiua, der ampliament deth vocabulari e d’ua melhora estructuracion dera expression e comprenença orau des escolans.

Era colleccion Petit País, que va adreçada a mainatges e mainades de P-5 e de 1er e 2a on de primària, de 4 a 7 ans, consistís enes condes: : Era Hèira, Era Net de Sant Joan, Desir d’Aran, Mistèri ena escòla, Era Hèsta de Magràs, Es Crespèths, Era Legenda de Sant Jordi e Era Castanhèra.

petit

Es autors des tèxtes son: : Mª Lluisa Roig, Mireia Fabregat, Esther Palomar, Sira Ortiz, Sandra López, Mari Carmen Forment, Maite Bayo e Susana Vidal.

Es illustracions des condes dera colleccion an anat a cargue de: Carme Tamarit, Alberto Pallarés, Eli Moga, Montse Español, Kristina Nart, Carme Tamarit e José Fenoy.

Actuauments ja son 8 es títols disponibles dera colleccion.

En madeish acte tanben se presentèren dus condes dera colleccion Bibliotèca escolara dera Editoriau Teide. Pinocho e Tom Sawyer, qu'an estat tradusidi peth Departament de Lengua e Cultura deth Conselh Generau d’Aran e eth Centre de Recorsi Pedagogics de la Val d’Aran.