Aprobacion iniciau des modificacions des Nòrmes Subsidiàries de Planejament Urbanistic dera Val d’Aran

Eth Plen deth Conselh Generau d’Aran, en session extraordinària urgenta, a aprovat iniciauments per unanimitat es modificacions des Nòrmes Subsidiàries de planejament aplicables as municipis

vielha
photo_camera Ua fòto deth Conselh Generau.

Eth Plen deth Conselh Generau d’Aran, en session extraordinària urgenta, a aprovat iniciauments per unanimitat es modificacions des Nòrmes Subsidiàries de planejament aplicables as municipis d’Arres, Bausen, Bossòst, Es Bòrdes, Canejan, Les, Vielha e Mijaran, Vilamòs, e Naut Aran en çò que tanh ara regulacion dera preservacion e recuperacion des bòrdes e cabanes en solèr non urbanizable entà adaptar-les as determinacions deth vigent Plan Director Urbanistic dera Val d’Aran.

Dempús d'un procès participatiu coordinat des des servicis tecnics deth Conselh Generau d’Aran qu'an participat en eth pendent 2 ans toti es ajuntaments aranesi a trauès des sòns servicis tecnics, e en quauqua ocasion damb preséncia des bailes, s'a arribat a un consens entà dar compliment çò que determine eth plan Director Urbanistic dera Val d’Aran referent as edificacions preexistentes en terrens rustics. En cas, deth Naut Aran, era preexisténcia hè referéncia as bastiments existents abans der an 1968, e en rèste dera Val d’Aran abans der an 1982.

Eth Plan Director Urbanistic dera Val d’Aran, que siguec motiu de revision, s'aprovèc definitiuaments eth 20 de gèr de 2015 e condicione es plans d'organizacion urbanistica municipau, es nòrmes de planejament urbanistica, es plans derivadi, atau coma es sues modificacions de planejament urbanistic vigent que se les calerà adaptar as determinacions deth Plan Director”.

Aguesta aprobacion iniciau, hè referéncia a quate articles des nòrmes subsidiàries. En concrèt se tracte des articles 31, 119, 120 e 126 que regulen es aspèctes religadi damb es determinacions deth Títol VIII dera Modificacion deth Plan Director Urbanistic dera Val d’Aran. Aguesta modificacion, recuelh era definicion der emplec e òci familhau previst en article 111.

A compdar dera presenta aprobacion iniciau, se daurís un termini de 45 dies d'informacion publica, entà que, tant particulars coma administracions publiques, poguen presentar allegacions.

Es naues reünions previstes damb es ajuntaments se centraràn en auançar era possibilitat que, ath torn deth mes d'octobre se pogue aprovar definitiuaments ena Comission d'Urbanisme dera Val d’Aran aguestes modificacions.

Un des aspèctes que serà resolvut damb era aprobacion definitiva serà que, totes es intervencions enes bòrdes o cabanes de mantenença o conservacion entà emplec ludic familhau o pagés, poderàn èster autorizades pes ajuntaments.

Es reconstruccions de rèstes d'edificacions preexistentes, claraments definides es sues dimensions, poderàn èster rebastides prealabla aprobacion deth projècte per part dera Comission d'Urbanisme d’Aran.

Eth caractèr urgent deth Plen deth Conselh a estat entà qu’era informacion publica e participativa de 45 dies abils sigue abans deth mes d'agost qu'ei considerat inabil a d’aguesti efèctes, e sustot entà dar compliment ara volontat des ajuntaments dera Val d’Aran qu'aguest tramit pogue èster resolvut laguens er an 2017.

A compdar dera aprobacion definitiva d'aguesta modificacion es ajuntaments aranesi auràn d'elaborar eth catalòg de bòrdes e cabanes des sòns municipis entà que poguen èster aprovadi posterioraments pera Comission d'Urbanisme d’Aran.